Швейцарийн хөгжлийн агентлаг нь УИХ-ын Тамгын газар, НҮБ-ын Хөгжлийн хөтөлбөртэй хамтран орон нутгийн засаглалын бодлого, шийдвэр гаргалтад иргэд, олон нийтийн оролцоог хангах, аймгийн ИТХ-ын төлөөлөгчдийг чадавхжуулах зорилгоор 2012-2016 онд “Нутгийн өөрөө удирдах ёсны байгууллагыг бэхжүүлэх нь” төслийг хэрэгжүүлсэн бол 2017-2020 онд “Төлөөллийн байгууллагуудыг бэхжүүлэх нь” төслийг хэрэгжүүлэн ажиллаж байна. Эдгээр төслүүдийн хүрээнд багийн Иргэдийн нийтийн хурал , Аймаг сумын ИТХ-ын төлөөлөгчдийг чадавхжуулах чиглэлээр олон талт сургалт, арга хэмжээнүүдийг зохион байгуулж, хамтран ажиллаж байгаа юм.



Швейцарийн хөгжлийн агентлаг нь 2002 оноос эхлэн Монгол Улсад, 2004 оноос эхлэн Ховд аймагт төсөл хөтөлбөр хэрэгжүүлж эхэлжээ. Хамтын ажиллагааны 15 жилийн хугацаанд Цөлжилтийг сааруулах төсөл, Залуучуудын хөдөлмөр эрхлэлтийг дэмжих хөтөлбөр, Малын эрүүл мэнд, түүхий эдийн мөшгөх тогтолцооны төсөл, Хариуцлагатай уул уурхай, Дулааны алдагдал бууруулах төсөл зэрэг 30 гаруй төсөл хөтөлбөрийг хэрэгжүүлсэн ба одоогоор 17 төслийг хамтран хэрэгжүүлж байна.

Уулзалтын үеэр хатагтай Марина Караббио болоод Ховд аймагт ажиллаж буй ажлын хэсгийнхэн дээрх төслүүдийн хугацааг сунган хэрэгжүүлэхэд анхаарч, тэр дундаа Монгол ногоо, Ногоон алт төслүүдэд голчлон хамтран ажиллана гэдгээ илэрхийллээ.
Бэлтгэсэн: Т. Азжаргал