Ховд аймгийн ЭМГ-аас тусгай баг бүрдүүлэн Булган-Такешкен боомтод очиж коронавирусээс урьдчилан сэргийлэх, тусгаарлах газар байгуулан мэргэжил арга зүйгээр ханган гурван сая төгрөгийн өртөгтэй халдвар хамгааллын хувцсыг боомт дээр ажиллаж байгаа ажилчдад хүлээлгэн өгсөн байна. Мо Эн Ко ХХК-ны зүгээс Хөшөөтийн уурхайгаас тээвэрлэлт хийж буй жолооч нарт эрүүл мэндийн тусламж үйлчилгээ үзүүлэх, урьдчилан сэргийлэх арга хэмжээг авч ажиллах үүднээс эмч томилон ажиллуулж байгаа гэсэн мэдээллийг өгсөн боловч тухайн газар дээр мэргэжлийн байгууллагууд очиж танилцахад дээрх мэдээлэл худлаа байсан талаар онцгой комиссын хурлын үеэр ЭМГ аас мэдээллээ.



Мөн хурлаар Короновирусээс урьдчилан сэргийлэх үүднээс хөл хөдөлгөөн ихтэй, эрсдэлийн төвшин өндөрт тооцогддог баар, караоке, ресторан зэрэг байгууллагуудыг шаардлагатай тохиолдолд шинийн тавныг хүртэл хаах тухай хэлэлцэв.Түүнчлэн захуудын үйл ажиллагаанд мэргэжлийн байгууллагуудаас бүрдсэн ажлын хэсэг 7 хоногийн хугацаатай ажиглалт хийн ажилласан бөгөөд энэ үеэр нойл, зогсоолын хүрэлцээ муу, хог хаягдлаа ил задгай хаядаг, цэвэрлэгээ муу, худалдаа наймаа эрхлэгчид амны хаалт зүүгээгүй, халдвар хамгааллын асуудлаа орхигдуулсан, хүнсний бүтээгдэхүүний хадгалалт хамгаалалт муу, төрийн өмчит газрыг дур мэдэн дамлан зарсан зэрэг зөрчил дутагдал илэрсэн гэдгийг ажлын хэсгийн зүгээс мэдээлэл болгон өгсөн байна. Тиймээс эрсдэлт нөхцөл байдал үүсээд байгаа энэ цаг үед хараа хяналт сул байгаа олон нийтийн үйлчилгээний газруудыг хаах нь зөв шийдвэр хэмээн үзэж  задгай захуудын үйл ажиллагааг шинийн таван хүртэл хаах хүртэл арга хэмжээг авч ажиллах тухай санал солилцов.


Коронавирусийн халдвараас урьдчилан сэргийлэх цаг үеийн мэдээ мэдээлэл, сэрэмжлүүлэг, зөвлөмжийг олон нийтэд цаг алдахгүйгээр хүргэн ажиллаж байгааг мэргэжлийн байгууллагууд энэ үеэр онцолсон юм. Гэвч халдвараас урьдчилан сэргийлэх ариутгалын бодис, амны хаалтын нөөц байхгүй хомстолд орсон хэвээр байгааг дурдсан юм. Ховд аймгийн ЭМГ-аас гар ариутгагч бодисыг үйлдвэрлэн иргэдэд нийлүүлж байгаа хэдий ч хүрэлцэхгүй байгааг хэллээ. Мөн амны хаалтны тухайд улс даяар хомстол үүсэж, цаанаас нийлүүлдэг байгууллагууд үнээ 350 орчим төгрөгөөр нэмэгдүүлээд байгааг мэргэжлийн байгууллагын зүгээс мэдээлэл болгон өглөө. Тиймээс иргэдийн эрүүл мэндийг хамгаалах, урьдчилан сэргийлэх бүхий л талын боломжийг судалж шаардлагатай тохиолдолд орон нутагтаа амны хаалт хямд үнээр үйлдвэрлэн нийлүүлэх боломжийг судалж үзэхийг онцгой комиссын зарим гишүүд санал болголоо.



Дэлхий дахинд Коронавирусын халдвар тархсанаас хойших хугацаанд Ховд аймгийн тухайд 1 сэжигтэй тохиолдол бүртгэгдэж улмаар тухайн иргэн нь Коронавирусаар өвчлөөгүй болох мэргэжлийн байгууллагуудын дүгнэлт, шинжилгээний хариу гарсныг тухай бүрт нь мэдээлж байсан. Харин энэ сарын 8-9-ны үед дахин 2 сэжигтэй тохиолдол бүртгэгдэж тусгаарлаад байгаа мэдээлэл цахим орчинд тавигдсан. Энэ талаар онцгой комиссын гишүүд мэргэжлийн байгууллагуудаас хурлын үеэр тодруулахад: Мөн адил шинжилгээний хариу сөрөг гарсан талаар мэдээлэл хүргэсэн юмаа. Харин цаг үеийн мэдээ мэдээллийг үнэн бодитой хүргэн ажиллахад мэргэжлийн байгууллага хоорондын уялдаа тийм ч сайн байж чадахгүй байгааг онцгой комиссын гишүүдийн зүгээс шүүмжилж байлаа. Тиймээс цаашид ЭМГ болон БОЭТ ажлын уялдаа холбоогоо улам бүр сайжруулан, цаг үеийнхээ мэдээ мэдээллийг тогтмол солилцож байхыг энэ үеэр албан ёсоор сануулсан байна.
Бэлтгэсэн: Б. Сувдаа