Ховд аймгийн ЕБ-ын лаборатори 1-р сургуулийн хашаанд тус сургуулийн сурагчдын дотуур байрны зориулалттай барилга 1973 онд ашиглалтад орж байжээ. Зах зээл эхэлж өмч хувьчлалаар сурагчдын дотуур байрыг тухайн сургуулийн багш нар хувьдаа шилжүүлэн худалдаж авснаар 17 айл тус байранд саяхныг болтол амьдарч байсан юм. Насжилт өндөртэй дотуур байр нь цаашид ашиглагдах боломжгүй гэсэн мэргэжлийн байгууллагуудын дүгнэлт гарснаар хувьчлагчдийн хүсэлтээр барилгыг нурааж дахин төлөвлөлтөд оруулан, 35 айлын орон сууцны барилгын ажлыг энэ хавраас эхлүүлсэн. Гэвч тухайн барилгыг гүйцэтгэгч компани нь хугацаа алдсанаас ажил гүйцэтгэл хойшлогдсоор хичээлийн шинэ жилтэй золгоод байна. Тэгвэл сурагчдын эрүүл мэнд амь насанд аюул учруулж болзошгүй орчин нөхцөл үүсээд байгаа барилгын ажлыг хичээлийн жил эхэлсэнтэй холбоотойгоор цааш үргэлжлүүлэх боломжгүй гэсэн утга бүхий мэдэгдлийг сургуулийн захиргаа, мэргэжлийн байгууллагуудаас гаргаж, хүүхдийн аюулгүй сурах орчин бүрдээгүй учир хичээлийн шинэ жилийг эхлүүлэх боломжгүй гэдгийг мэргэжилтнүүд онцолж байна.



Тус газарт барилга барих зөвшөөрлийг Мэргэжлийн хяналтын газрын улсын байцаагчийн дүгнэлтэд үндэслэн аймгийн засаг даргын 2019 оны 04 сарын 15-ны өдрийн, газар ашиглалтын зориулалтыг өөрчлөх тухай А/230-р захирамж гарсан байдаг. Барилгын зөвшөөрлийг авахдаа нэгдүгээр сургуулийн багш ажилчдын 17 айлын орон сууцыг барина гэж байсан бол одоо 35 айлын орон сууцын суурь тавигдаад байгаа төдийгүй сургуулийн багш ажилчдаас тус байранд нэг ч хүн хамрагдаагүй байна. Нэгдүгээр сургуулийн гадна талбайд барилга бариулахгүй гэсэн албан бичгийг сургуулийн зүгээс холбогдох байгууллагууд, барилгын компанид удаа дараа хүргүүлсэн боловч одоог хүртэл хариу ирээгүй байна.

Бэлтгэсэн: Б. Оюунжаргал